Presidenti ukrainas, Volodymyr Zelensky i kërkoi sot Moskës të angazhohet në bisedimet e mëtejshme të paqes “pa vonesë” – ndërsa lufta hyn në javën e katërt.
Në adresimin e përditshëm, ai tha se “Kjo është mundësia e vetme për Rusinë që të zvogëlojë dëmin nga gabimet e veta”.
“Është koha për t’u takuar, është koha për të biseduar, është koha për të rivendosur integritetin territorial dhe drejtësinë për Ukrainën. Përndryshe, humbjet e Rusisë do të jenë të tilla që do t’ju duhen disa breza për t’u rikuperuar”, pohoi i pari i shtetit t Ukrainës.
Ukraina dhe Rusia janë përfshirë në disa raunde bisedimesh deri më tani, duke filluar në Bjellorusi dhe së fundmi duke u zhvilluar përmes video-konferencës.
Megjithatë, ata ende nuk kanë arritur një marrëveshje për një armëpushim ose një tërheqje.
Ndryshe, agresioni rus ka filluar më 24 shkurt dhe deri më tani ka shkaktuar mijëra viktima dhe dëme materiale. /Telegrafi/
