Dy tragjedi të rënda kanë goditur ditë më parë familjen Neziraj nga Dobidoli i Rahovecit të Kosovës, azilkërkues në Zvicër
Së pari, siç merr vesh Albinfo.ch nga burimet e afërta me familjen, më 21 shtator, djali 20 vjeç, Lirim (Hamëz) Neziraj, i sëmurë nga epilepsia dhe autizmi, ka humbur jetën nën rrotat e trenit në Oerlikon të Cyrihut.
Qendra e azilit ku banonte familja Neziraj ishte shumë afër binarëve të trenit dhe ndër pikat e rralla ku nuk ka të vendosur ndonjë mburojë.
Nga pikëllimi për humbjen e të birit, vetëm pesë ditë më vonë pëson sulm në tru dhe vdes edhe i ati, Hamëz Neziraj, i lindur në vitin 1967, ish-luftëtar i UÇK-së, veteran i luftës.
Tragjedia e rëndë e familjes Neziraj ka ngjallur dhembje dhe ndjenjën e solidaritetit të bashkatdhetarëve tanë me qëndrim në Zvicër.
Kështu, siç merr vesh Albinfo.ch. pak pas ngjarjes është iniciuar një aksion për grumbullimin e mjeteve për dërgimin e kufomave për varrim, në vendlindje.
Për shkak të statusit të tyre si azilkërkues, pjesëtarët tjerë të familjes, nëna, një vajzë dhe një djalë, nuk lejohen të shkojnë në Kosovë për të marrë pjesë në varrim.
