Seanca gjyqësore për ngjarjet e 27 prillit dhe lëndët e PSP-së “Toplik” dhe “Titanik 3”

Në Gjykatën Penale në Shkup sot duhet të mbahen seanca gjyqësore për ngjarjet e 27 prillit të vitit të kaluar në Kuvendin e Maqedonisë, si dhe për lëndët e PSP-së “Toplik” dhe “Titanik 3”.

Baby Boo

Gjykimi për ngjarjet e 27 prillit ndodhet në fazën e dëshmive dhe në gjykatë prezantohen video-inçizime nga kamerat e sigurisë në Kuvend, përcjell Telegrafi Maqedoni.

Për këto ngjarje të akuzuar janë 33 persona, prej të cilëve 31 për veprën penale “rrezikim terrorist të rendit kushtetues” dhe 2 persona për veprën “nxitje”.

Në rastin “Toplik” i akuzuari i parë është Mile Janakieski. Ai dyshohet se ka shitur tokën shtetërore për ndërtimin e kompleksit “Sonçev Grad” në Sopishte, ndërsa të akuzuar janë edhe pesë persona tjerë.

Kurse në rastin “Titanik 3” të akuzuar janë Ismet Guri dhe deputeti i BDI-së Ejup Alimi. Ata dyshohen për shkatërrim të materialit zgjedhor dhe falsifikim të rezultatit të zgjedhjeve lokale të vitit 2013 në Komunën e Çairit.