Prokurori i krimit të organizuar dhe korrupsionit, Islam Abazi i pyetur nga Alsat nëse pas vendimit të Departamentit Amerikan të Shtetit (DASH) për futjen e kreut të Strugës, Ramiz Merko në listën e zezë do të ndërmerr hapa për shqyrtimin e konstatimeve nga raporti, ka deklaruar shkurt se “institucioni me të cilin udhëheq ai nuk ka kompetencë për të komentuar vendimet e DASH.
Nga ana tjetër, Departament amerikan i Shtetit dje e shpalli non grata Ramiz Merkon, kryetar i Komunës së Strugës në Maqedoninë e Veriut.
Uashingtoni nuk do të lejojë hyrjen e tij në Shtetet e Bashkuara, për shkak të përfshirjes së tij në korrupsion të konsiderueshëm. Në njoftimin e Departamentit të shtetit thuhet se kryetar i komunës së Strugës, ka përvetësuar fonde në mënyrë të paligjshme dhe ka ndërhyrë në procese gjyqësore dhe procese të tjera publike, duke dëmtuar besimin e publikut ndaj institucioneve demokratike të Maqedonisë së Veriut.
Veprimi i sotëm thuhet më tej në njoftim dërgon mesazhin se Shtetet e Bashkuara qëndrojnë krah Maqedonisë së Veriut për të nxitur stabilitetin përmes forcimit të institucioneve demokratike dhe trajtimit të mangësive që lidhen me sundimin e ligjit.
Sipas njoftimit nuk do t’i lejohet hyrja në Shtetet e Bashkuara edhe bashkëshortes së Ramiz Merkos, Shpresa Merko, si dhe tre fëmijëve të tyre në moshë të rritur, Gencit, Nazmijes dhe Drenushës.
Ky përcaktim ripohon angazhimin e Shteteve të Bashkuara për të luftuar korrupsionin, i cili dëmton interesin publik, pengon prosperitetin ekonomik të vendeve dhe pakëson aftësinë e qeverive për t’iu përgjigjur në mënyrë efektive nevojave të njerëzve të tyre përfundon njoftimi i Departamentit amerikan të Shtetit.
