Sulmi ndaj Klodiana Lalës, pronari i televizionit: Edhe unë kam marrë plumb në zarf ku shkruhej “For you”. Shqiptarët të vendosin, të mirën apo të keqen!

Kolegë të shumtë gazetarë kanë reaguar menjëherë pas sulmit ndaj gazetares Klodiana Lala, ku pas mesnate u qëllua me breshëri plumbash banesa e babait të saj.

Baby Boo

Ndër ta është edhe gazetari italian që prej disa vitesh punon në Shqipëri, Karlo Bolino.

Duket se kjo ngjarje e rëndë Bolinos i ka rikthyer kujtimet e pakëndshme kur punonte si gazetar në Itali, dhe merrte kërcënime, ndër to siç rrëfen ai “një zarf që ka brenda një fishek kalibër 9 mm, që ka të shkruar sipër “for you”.

Bolino tregon se si ka arritur ta kthejë frikën në forcë duke mos e braktisur profesionin.

“Edhe unë kam patur frikë, si shumë gazetarë, të cilët kanë shkruar dhe vazhdojnë të shkruajnë kundër kriminalitetit e kështu që e imagjinoj shumë qartë gjendjen shpirtërore që po përjeton sot Klodiana Lala, e cila filloi të punojë pikërisht me mua. Instikti i parë është ai që ta braktisësh, ta ndryshosh sektorin, të merresh me diçka tjetër: ndoshta me udhëtimet, me turizmin apo me modën. Por, më pas, reflekton dhe frika ndeshet me një tjetër ndjenjë, po aq të fuqishme dhe të cilën pikërisht kërcënimet e ushqejnë: krenarinë”.

Më tej në shkrimin e tij në “Shqiptarja.com” ai bën thirrje për më shumë solidaritet me gazetaren Lala, për të mos e lënë atë të vetme. “tani shqiptarët duhet të vendosin: Me të Mirën, apo me të Keqen”, shkruan Bolino.

“Klodiana Lala nuk duhet të lihet e vetme. Asnjë gazetar i kërcënuar apo edhe vetëm i fyer nuk duhet të lihet i vetëm. Pasi një gazetar i vetëm është edhe një gazetar i dobët, që nuk do ta gjejë kurrë forcën t’i rezistojë asnjë lloj kërcënimi e presioni nëse nuk e ndjen veten të mbrojtur nga gjithë Të Mirët që e rrethojnë. Kjo është një Luftë mes Të Mirës dhe të Keqes dhe të gjithë duhet të vendosin se nga cila anë janë.”