Sekretari amerikan i Mbrojtjes, Xhejms Matis arriti në aeroportin ndërkombëtar “Shkupi”, ku u prit me nderime të larta shtetërore nga Kryeministri i vendit Zoran Zaev.
Mattis pritet gjatë ditës të takohet me kryeministrin Zoran Zaev dhe me ministren e Mbrojtjes Radmila Sheqerinska për të shprehur përkrahje për referendumin e 30 shtatorit për çështjen e emrit.
Javë më parë sekretari amerikan Mattis deklaroi se do ta vizitojë Maqedoninë duke shprehur përkrahje të qartë për referendumin e 30 shtatorit për çështjen e emrit, por edhe shqetësim për shkak të ndërhyrjes së mundshme të Moskës në proces.
“Do të shkoj t’i vizitoj miqtë tonë nga Maqedonia dhe do t’u bëj me dije se ShBA-të e përkrahin popullin e Maqedonisë”, tha Mattis në deklaratë për gazetarët në Pentagon.
Mattis theksoi se është i shqetësuar se Rusia do të mund të përpiqet të ndërhyjë në procesin e referendumit në Maqedoni.
“Nëse keni votim, Moska do të ndërhyjë. Unë jam i shqetësuar për këtë. Ndërhyrje e tillë Rusia e praktikonte nga Estonia deri në ShBA. nga Ukraina deri në Maqedoni, gjithmonë përshtatet në situatë konkrete’, tha Mattis.
Për herë të parë në 14 vitet e kaluara Sekretar amerikan për Mbrojtje është në vizitë në Maqedoni.
