Edhe shtatë zyrtarë policorë janë arrestuar si pjesë e hetimit për tragjedinë që ndodhi në diskotekën “Pulse” në Koçan, bëri të ditur sonte Prokurori Publik Ljupço Kocevski në emisionin “Top Tema” në televizionin Telma.
– Tani sapo mora informacion nga prokurori i Koçanit se është lëshuar urdhër për arrestimin e shtatë zyrtarëve të rinj policorë. Ata do të ndalohen dhe për ta do të kërkohen masa paraprake – deklaroi Kocevski, por nuk sqaroi nëse bëhet fjalë për persona që kanë qenë të pranishëm në vendin e ngjarjes apo për zyrtarë që eventualisht nuk kanë vepruar sipas kompetencave të tyre.
Me këtë, numri i zyrtarëve policorë të dyshuar rritet në 14, pasi afro një muaj më parë ishin arrestuar shtatë policë të tjerë. Deri tani, hetimi po zhvillohet për një vepër penale, dhe ajo është rrezikim i jetës dhe trupit të njerëzve.
