“Ra në shpellën e Pëllumbasit, nxirret pas 15 ditësh trupi i pajetë i 20-vjeçarit Xhorxho Seferi”


Polumbarët e RENEA-s kanë nxjerrë pas dy javësh nga ujërat e Erzenit, trupin e pajetë të 20-vjeçarit Xhorxho Seferi i cili ra në humnerën e shpellës së Pëllumbasit, në periferi të Tiranës. Ai është gjetur rreth 1 kilometër larg nga vendi ku ra nga lartësia. Ishte e diela e 19 majit kur dy të rinjtë Xhorxho Seferi dhe Fabio Dukagjini kishin vendosur të kalonin fundjavën në Pëllumbas. Por teksa po ngjisnin shkëmbin e thepisur, ata rrëshqasin dhe bien në humnerë.

Nga thellësia e kanionit disa orë më pas, polumbarët arritën të nxjerrin të gjallë, Fabio Dukagjinin, i cili kishte marrë lëndime në trup, ndërsa për Xhorxho Seferin nuk kishte asnjë gjurmë. 

(Fabio Dukagjini pësoi lëndime nga rënia në humnerë)

Kërkimet nuk u ndërprenë që nga dita e parë për gjetjen e 20-vjeçarit, por çdo ditë dy Polumbarë të RENEA-s dhe disa punonjës Policie të Farkës kanë krehur shtratin e Lumit. Rreth 1 km më poshtë vendit ku dyshohej se ishte mbytur, Polumbarët e Reneas vendosën një rrjetë pritëse me qëllim pengimin e trupit për të mos e marrë rrjedha e lumit. 

Gjatë ditëve të kërkimit u devijua pothuaj 1/3 e rrjedhës së lumit. Ndërsa sot rreth orës 15:00, në vendin ku Polumbarët kishin vendosur rrjetën pritëse, dy Polumbarë të RENEA-s kanë gjetur trupin e viktimës. Trupi i viktimës është nxjerrë dhe transportuar tek autoambulanca nga Polumbarët, punonjësit e Policisë të Farkës dhe nga zjarrfikësit, ndërsa më pas u dërgua në morgun e spitalit ku do t’i kryhet edhe autopsia mjeko-ligjore për të përcaktuar shkaqet e vdekjes.

Njoftimi i policisë:

Polumbarët e Reneas gjejnë në lumin Erzen dhe nxjerrin trupin e pa jetë të 20 vjeçarit Xh.S.
Në lidhje me ngjarjen e ndodhur më datë 19.05.2018 në “Shpellën e Pëllumbasit” ku shtetasi Xh. S., rreth 20 vjeç, si pasojë e rënies aksidentale nga gryka e kanionit në ujërat e lumit Erzen ku humbi jetën, dhe trupi i tij nuk u gjend si pasojë e marrjes nga rrjedha e ujit, ju bëjmë me dije se:
Ditën e sotme rreth orës 15.00, rreth 1 kilometër larg nga vendi ku shtetasi Xh. S., ra nga lartësia, nga Polumbarët e Reneas është gjetur dhe është nxjerrë nga ujërat e lumit Erzen trupi i shtetasit Xh. S., rreth 20 vjeç.

Pavarësisht kërkimeve intensive për një javë rresht nga Polumbarët e Reneas dhe një grup punonjësish të Stacionit të Policisë Farkë në terren shumë të vështirë nuk u bë e mundur gjetja e trupit të 20 vjeçarit.

Kërkimet nuk u ndërprenë, por çdo ditë dy Polumbarë të Reneas dhe disa punonjës Policie të Farkës kanë krehur shtratin e Lumit. Rreth 1 km më poshtë vendit ku dyshohej se ishte mbytur, Polumbarët e Reneas vendosën një rrjetë pritëse me qëllim pengimin e trupit për të mos e marrë rrjedha e lumit. 

Gjatë ditëve të kërkimit u devijua pothuaj 1/3 e rrjedhës së lumit. Sot rreth orës 15:00, në vendin ku Polumbarët kishin vendosur rrjetë pritëse, dy Polumbarë të Reneas kanë gjetur trupin e viktimës. Trupi i viktimës është nxjerrë dhe transportuar tek autoambulanca nga Polumbarët, punonjësit e Policisë të Farkës dhe nga zjarrfikësit ku po transportohet për në morgun e spitalit.

Baby Boo