Nëse ndryshimet kushtetuese nuk sigurojnë shumicën e dy të tretave në Kuvend, kryeministri Zoran Zaev paralajmëroi se do të ketë zgjedhje të parakohshme parlamentare.
Zaev ditën e djeshme e vlerësoi si të suksesshme dhe i përgëzoi qytetarët që dolën për të ushtruar të drejtat e tyre të votës në referendum. Sipas tij 90 për qindëshi i qytetarëve që kanë votuar “PRO” tregon qartë se Marrëveshja me Greqinë duhet të kalojë edhe në Parlament. Në rast se kjo nuk ndodh, ai tha se do të organizohen zgjedhje të parakohshme me procedurë të shpejtë, duke përmendur 25 nëntorin si datë të mundshme për mbajtjen e tyre, shkruan Gazeta Lajm. Ai megjithatë tha se brenda 10 ditëve do të realizojë takime, duke përfshi edhe kryetarin e VMRO-DPMNE-së, Kristijan Mickovski për të gjetur rrugëdalje nga kjo situatë përmes Parlamentit.
Ai ftoi gjithë deputetët e Kuvendit që të bashkohen dhe siç tha, ta çojnë vendin atje ku përket – në NATO dhe BE.
“Në këtë referendum qytetarët e dhanë mendimin e tyre, ndërsa nuk ishte i lehtë. Kjo është vlerë e demokracisë dhe ju falënderoj gjithë qytetarëve që votuan në referendum. Përfundimisht vendosën votat e atyre që votuan. Ndërsa këtë e bënë edhe disa nga anëtarët e OBRM-PDUKM-së. Vota e tyre është tullë serioze për të ardhmen e Maqedonisë. Në referendumin sotëm votuan më shumë se 600 mijë qytetarë dhe thanë se Maqedonia duhet ta pranojë marrëveshjen me Greqinë. Maqedonia mori shumicë votash “pro”. Edhe nëse kishte census, ky rezultat prej 600 mijë qytetarësh që votuan “pro” do të ishte “për” anëtarësim në NATO”.
“Populli ka bërë zgjedhje të madhe duke zgjedhur një qëllim për të ardhmen e vendit. Është koha që deputetët e Kuvendit të Maqedonisë ta ndjekin zërin e shumicës së votave dhe të sigurojnë të ardhme më të mirë. Si kryeministër ftoj gjithë liderët dhe deputetët të bashkohemi dhe ta çojmë vendin tonë atje ku përket – në NATO dhe BE. Marrëveshje më të mirë me Greqinë nuk mund të ketë. Të mos luajmë me të ardhmen tonë”, tha mes tjerash Zoran Zaev.
Ai shtoi se nëse nuk arrihen ndryshimet kushtetuese që i parasheh marrëveshja me Greqinë, mjeti i fundit demokratik janë zgjedhjet e parakohshme parlamentare.
