Nga janari, deri në tetor të këtij viti, kanë ndodhur 13 mijë e 195 aksidente trafiku në gjithë vendin, e që i bie 1 mijë e 594 më pak sesa në periudhën e njëjtë të vitit 2017.
Mirëpo, pavarësisht uljes së numrit të përgjithshëm të aksidenteve, numri i personave të vdekur nga aksidentet ka mbetur pothuajse i njëjtë, raporton KTV.
Sipas statistikave të Policisë gjatë këtij 10-mujori, në aksidente kanë vdekur 102 persona, vetëm një më pak se në periudhën e njëjtë të vitit 2017, percjell Fakte.
Në këto statistika, nuk janë përfshirë edhe katër personat që vdiqën si pasojë e aksidentit të së premtes në rrugën Prishtinë – Gjilan, që e rrisin numrin e përgjithshëm të vdekjeve në komunikacion.
Ekspertët e komunikacionit vlerësojnë se numri i vdekjeve në komunikacion është shqetësues.
Ata vlerësojnë se një situatë e tillë është si pasojë e dështimit të sistemit shtetëror për të ngritur vetëdijen dhe për të krijuar siguri më të madhe në komunikacion.
Visar Baxhaku, inxhinier i komunikacionit rrugor, thekson se nëse as tash nuk ndërmerren masat e nevojshme, pasojat në të ardhmen do të jenë edhe më të mëdha.
Nga numri total i aksidenteve, lëndime kanë marrë 10 mijë e 483 persona, ndërsa 7 mijë e 863 aksidente kanë përfunduar me dëme materiale.
