Zyrtarët në Kolumbi thanë se katër fëmijë të zhdukur nga rrëzimi i një avioni në xhungël janë gjetur të gjallë dhe të shëndoshë edhe pas dy javësh.
Nëna e tyre dhe të rriturit e tjerë që ishin në avion nuk mbijetuan.
Agjencia qeveritare e mirëqenies së fëmijëve, tha se kishte marrë informacion nga “terreni” se fëmijët ishin gjetur në gjendje të mirë shëndetësore.
Një pilot tha se atij i kishin thënë gjithashtu se fëmijët ishin gjetur nga njerëzit indigjenë thellë në pyll.
Ushtarët që kanë marrë pjesë në kërkim, megjithatë, ende nuk i kanë parë vetë fëmijët.
Piloti i avionit që u rrëzua kishte raportuar më herët për problemet me motorin.
Pas një përpjekjeje të madhe kërkimi që përfshinte më shumë se 100 ushtarë, avioni më në fund u gjet të hënën, dy javë pasi ishte zhdukur.
Trupat e pilotit, bashkëpilotit dhe 33-vjeçares Magdalena Mucutuy, nënë e katër fëmijëve, u gjetën në vendin e përplasjes në provincën Caquetá.
Por fëmijët, të cilët janë të moshës 13, nëntë dhe katër vjeç, si dhe një foshnjë 11 muajshe, nuk u gjetën askund.
Trupat e pilotit, bashkëpilotit dhe 33-vjeçares Magdalena Mucutuy, nënë e katër fëmijëve, u gjetën në vendin e përplasjes në provincën Caquetá.
Por fëmijët, të cilët janë të moshës 13, nëntë dhe katër vjeç, si dhe një foshnjë 11 muajshe, nuk u gjetën askund.
Ekipet e kërkimit gjetën gjithashtu një strehë të improvizuar të bërë nga shkopinj dhe degë.
“Ne mendojmë se fëmijët që ishin në bordin e avionit janë gjallë. Kemi gjetur gjurmë në një vend tjetër, larg vendit të rrëzimit dhe një vend ku ata mund të jenë strehuar,” tha koloneli Juan José López të mërkurën.
Nga frika se fëmijët po enden gjithnjë e më thellë në xhungël, ushtria vendosi helikopterë të cilët lëshuan një mesazh të regjistruar nga gjyshja e tyre në gjuhën Huitoto duke i nxitur ata të qëndronin aty.
Kërkimi u pengua nga shirat e dendur, por të mërkurën Instituti Kolumbian për Mirëqenien e Fëmijëve i tha presidentit të Kolumbisë se kishte marrë raporte “nga terreni” se fëmijët ishin gjetur nga vendasit.
Presidenti Petro e postoi lajmin në Twitter, duke thënë se ishte gjetur “pas një kërkimi të mundimshëm”.
Megjithatë, konfuzioni u ngrit kur forcat e armatosura të Kolumbisë thanë se ata vetë nuk kishin arritur ende të bënin kontakte me fëmijët “për shkak të kushteve të vështira meteorologjike dhe terrenit të vështirë” – dhe nuk mund të konfirmonin lajmin për shpëtimin e tyre.
Ndërkohë, Avianline, një operator lokal avioni që zotëronte avionin e rrëzuar, lëshoi një deklaratë duke thënë se edhe ajo kishte marrë raporte se fëmijët ishin gjetur.
Kompania shtoi se nuk kishte asnjë mënyrë për të konfirmuar nëse informacioni ishte i saktë, por theksoi se mbërritja e fëmijëve me varkë mund të ishte vonuar nga reshjet e dendura, të cilat e kanë bërë lumin shumë të rrezikshëm për të lundruar.
Radio stacionet vendase kanë raportuar gjithashtu se fëmijët u gjetën nga një vendas dhe po transportoheshin me lumë në Cachiporro.
Presidenti Petro nuk ka dhënë asnjë lajm për fëmijët që nga postimi në Twitter në të cilin njoftoi se ata ishin gjetur.
Babai i fëmijëve më herët kishte thënë se nuk po e humbte shpresën. Ai i tha Caracol Radio se motra e tij kishte humbur një herë në pyll për një muaj dhe arriti të kthehej.
Mendohet se njohuritë e njerëzve të Huitoto për frutat dhe aftësitë e mbijetesës në xhungël do t’u kenë dhënë fëmijëve të vegjël një shans më të mirë për t’i mbijetuar sprovës.
