Isa Mustafa shpallet kryetar nderi i LDK-së


Kryetari i ri i LDK’së, Lumir Abdixhiku, ka marrë vendimin e parë në pozitën e re. Me propozim të tij, Isa Mustafa është shpallur si kryetar nderi i këtij subjekti.
Kjo është bërë e ditur nga faqja zyrtare e LDK’së në rrjetin social Facebook.
“Me propozim të kryetarit të LDK-së, Lumir Abdixhiku, Akademik Isa Mustafa shpallet kryetar nderi!”, thuhet aty.

Abdixhiku është zgjedhur si kryetar i ri i LDK’së në Kuvendin që u mbajt të dielën. Mustafa ishte kryetar prej vitit 2010 dhe udhëhoqi partinë deri më 14 mars 2020 kur zyrtarisht dha dorëheqje.
Lumir Abdixhiku është zgjedhur kryetar i Lidhjes Demokratike të Kosovës në Kuvendin e tetë të LDK-së.
Ekonomisti Abdixhiku është kryetari më i ri që e ka udhëhequr ndonjëherë LDK-në, ndërsa timonin e partisë po e merr në gjendjën më të keqe të saj prej themelimit.

Ai zyrtarisht është pjesë e LDK-së prej vitit 2017 dhe është zgjedhur tri herë deputetë në tri palë zgjedhje. Në të fundit, ai mbante numrin 11 në listë, ndërsa doli i treti më i votuari.
LDK-ja është akuzuar gjithmonë se nuk po reformohet dhe se vendimet e saj i marrin udhëeqja e quajtur “garda e vjetër”, të cilët janë pjesë e LDK-së prej dekadash.

Ndonëse është përfolur afërsia e Abdixhikut me ish-kryetarin Isa Mustafa, kryetari i zgjedhur i LDK-së kohëve të fundit, së paku publikisht, nuk kishte qëndrime të njëjta me udhëheqjen e partisë. Ai madje nuk kishte pranuar të bëhej ministër i Qeverisë që e udhëhiqte LDK-ja, pas rrëzimit të Albin Kurtit.
Abidxhiku kishte kundërkandidat, nënkryetarin e LDK-së, Lutfi Hazirin, që numëron disa dekada si pjesë e LDK-së. Kandidat ishte edhe Besian Mustafa, djali i veprimtarit të vrarë të LDK-së, Xhemajl Mustafa.
Pas certifikimit të zgjedhjeve, LDK-ja ka dalë partia e tretë me 12.76 për qind të votave. Pas rezultatit të shënuar, kryetari i LDK-së, Isa Mustafa e deklaroi dorëheqjen

Baby Boo