Johannes Hahn, komisioner për politikën evropiane të fqinjësisë dhe negociatat për zgjerim i ka bërë thirrje BE-së të japë një dritë jeshile për Shqipërinë dhe Maqedoninë këtë javë, duke theksuar rëndësinë e dhënies së një “sinjali pozitiv” për të gjithë rajonin e Ballkanit Perëndimor.
Vendimi për çeljen ose jo të negociatave të Shqipërisë e Maqedonisë me BE do të diskutohet ditën e nesëme dhe me gjasë do të aprovohet në 28-29 qershor gjatë saimitit të krerëve të BE-së.
Franca dhe Holanda mund të kërkojnë çeljen e negociatave me kushte, si më shumë reforma për luftën kundër krimit dhe korrupsionit në Shqipëri.
“Unë mendoj se të gjithë duhet të jemi të vetëdijshëm se sa e rëndësishme është të japim një sinjal pozitiv në rajon”, tha Hahn në një konferencë ndërqeveritare BE-Mali i Zi në Luksemburg.
Ai tha se Maqedonia duhet të “shpërblehet” për nënshkrimin e një marrëveshjeje me Greqinë për ndryshimin e emrit duke i dhënë fund një mosmarrëveshjeje 27-vjeçare midis Athinës dhe Shkupit.
“Unë mendoj se nëse kjo nuk shpërblehet në mënyrë kuptimplote, mendoj se kjo do të ketë një ndikim të menjëhershëm dhe të madh për stabilitetin e rajonit”, tha Hahn.
