Greqi, kapet shqiptari me 3 kallashnikovë


Një shtetas shqiptar është arrestuar nga policia greke, nën akuzën e trafikut të armëve.
Sipas policisë së Epirit, gjatë patrullimit në zonën e kufirit për parandalimin e trafikut të lëndëve narkotike me zonën kufitare që ndan dy vendet, një patrullë e saj pikasi me kamera termike një person që po transportonte një thes në vendin e quajtur “Asproklisi”, vetëm 2 km nga vija kufitare.

Pasi e lokalizuan, autoritetet mundën ta arrestojnë 30-vjeçarin shqiptar. Në thesin që ai po transportonte u gjetën 3 armë automatike AK-47 (kallashnikovë), 3 krëhëra dhe 47 fishekë të kalibrit 7.62 mm.

Prej hetimeve rezultoi se 30-vjeçari do t’i tranportonte ato deri në aksin që lidh kufirin me Igumenicën, e në vazhdim do të hipte në një automjet të dërguar prej porositësit të armëve, një shtetas shqiptar i shpallur tashmë në kërkim.

Ai do t’i dërgonte armët në kryeqytetin e vendit, ku edhe do të paguhej për transportin. Autoritetet besojnë se armët do t’iu shiteshin organizatave kriminale që operojnë në Athinë.

30-vjeçari do të dërgohet në gjykatë për masë sigurie gjatë orëve të paradites së të hënës, ndërsa armët do të dërgohen për ekspertizë balistike në Laboratorin e Kriminalistikës së Greqisë së veriut, në Selanik.

Top Channel

Baby Boo