Një makine të kompanisë shqiptare “Saba Bellça” në Bujanoc i është vënë zjarri.
Këtë e ka thënë kryetari i kësaj komune, Shaip Kamberi, duke shtuar se kjo është pasojë e politikës albanofobe së cilës, sipas tij, ditëve të fundit i ka paraprirë presidenti serb, Aleksandar Vuçiq, për një invazion të shqiptarëve mbi Vranjën. Ai thotë se pasojat tash po bien mbi kurrizin e kompanive shqiptare, njofton Klan Kosova.
“Vënia e zjarrit nëpër makineritë e kompanisë “Saba Bellça”, përveç që dëshmon mosgatishmërinë e shtetit për t’i mbrojtur kompanitë shqiptare, ajo flet edhe për mentalitetin e mbrapshtë që u përket viteve të ’90 ta”, ka thënë Kamberi përmes Facebook.
“Përveç dëmtimit të drejtpërdrejtë të shkaktuar kompanisë shqiptare “Saba Bellça”, një gjest i tillë ngjall frikën jo vetëm ndaj kompanive shqiptare por dëshmon edhe mungesë të stabilitetit për investitorë të huaj”.
“Heshtja e institucioneve kompetente për të pestën herë radhazi le të kuptohet që ato ose nuk janë të gatshme për t’i mbrojtur dhe trajtuar në mënyrë të barabartë të gjitha kompanitë e suksesshme ose përkrahin fushatën antishqiptare që ka për qëllim pengimin e biznesit shqiptar”.
Ai ka thënë se shpreson që ky rast të mos kalojë në heshtje.
“Besoj që kjo problematikë duhet të ngrihet në instancat më të larta vendore dhe kombëtare”.