25-vjeçari Hysen Meta, djali i Pëllumb Metës ëshrë një prej autorëve kryesore në vrasjen e babait të tij. I riu ka rrëfyer në polici të gjitha detajet e vrasjes të së atit.
Meta ka deklaruar se planin e vrasjes e ka thurur me të motrën. Me datë 10 shkurt, kur Pëllumb Meta ishte kthyer nga puna dhe kishte rënë për të fjetur në divan, i biri i kishte thënë të zgjohej dhe e kishte qëlluar me 4 plumba.
25-vjeçari ka deklaruar se babai i tij ishte bërë i padurueshëm dhe për gjithçka në shtëpi vendoste ai. Ndër të tjera kishte vendosur ta martonte të motrën me një emigrant që nuk e njihnin.
“Planin për vrasjen e babait e bëmë së bashku me motrën sepse ai ishte bërë i padurueshëm në familje. Për gjithçka në familje duhej të vendoste ai dhe të bëhej si thoshte ai. Ishte e pamundur që ta kundërshtoje. E fundit ishte vendimi për të fejuar motrën me një person që nuk e kishim idenë se kush ishte në kundërshtim me dëshirën e saj.
Në këto kushte vendosëm ta vrisnim e të zhduknim gjurmët. Vendosëm ta vrisnim me pistoletën e tij. Kështu që në mëngjes bëmë planin për ta vrarë.
Pasdite babai ishte shtrirë në divan dhe po pushonte. Në dhomë me mua ishte edhe motra. I thashë babait çohu. Ai u çua në këmbë dhe pastaj unë e qëllova 4 herë me pistoletë.
Më pas u morëm me zhdukjen e gjurmëve. E zhveshëm dhe e mbështollëm me plasmas. E transportuam te kasollja dhe aty e varrosëm.
Më vonë larguam dhe makinën. Shkuam me dy makina në sektorin Rinia. Unë me makinën e babait kurse vëllai me një makinë tjetër që ja morëm një shokut tonë të cilit i thamë se na duhej për nja një orë makina e tij. E lamë makinën e babait atje dhe u kthyem me makinën e shokut që e ngiste vëllai im. Pastaj me datën 13 unë u paraqita në polici dhe denoncova largimin e babait nga shtëpia”,-ka rrëfyer i riu.
