Policia ka ngritur kallëzim penal kundër një inspektori tatimor i Drejtorisë për të Ardhura Publike që është kapur duke marrë mito prej pesë mijë eurosh nga një pronar restorani në Qendrën Tregtare të Shkupit. Siç informon policia, 62 vjeçari i DAP-it, kishte bashkëpunuar me kontabilistët e pronarit të lokalit për t’i marrë pesë mijë eurot dhe ia kishte arritur qëllimit. Por, disa minuta pasi i kishte marrë paratë, e kishte parë veten në pranga.
Policia e kishte zënë në flagrancë dhe e kishte arrestuar menjëherë. Sot policia e kishte dorëzuar të dyshuarin tek prokurori publik me kallëzim për mitmarrje dhe ndërkohë i kishte arrestuar edhe kontabilistët bashkëpunëtorë. Inspektori e kishte mashtruar pronarin e lokalit se gjoja firma e tij kishte një borxh tejet të madh ndaj DAP-it, dhe për tia hequr borxhin, duhej të paguante një shumë më të vogël të mitos, njofton Shenja.
“Inspektorin e kanë ndihmuar kontabilistët, nëpërmjet të cilëve ai i ka kërkuar pronarit të lokalit pesë mijë euro, të cilat i ka marrë. Si shkëmbim, inspektoi gjoja do të fshinte një borxh të madh të firmës që e kishte ndaj DAP-it. Pronari i lokalit e paraqiti rastin më 9 tetor, dhe pas kësaj menjëherë janë ndërmarrë aktivitete. Dje, më 5 nëntor, personi i dëmtuar ka bërë takim me personin e dyshuar tek Qendra Tregtare e Qytetit, ku ia ka dhënë miton prej 5 mijë eurosh. I dyshuari është arrestuar në vendin e ngjarjes, ndërsa pastaj janë arrestuar edhe kontabilistët”, informoi policia.
